नेपालगन्जस्थित सञ्जीवनी कलेज अफ मेडिकल साइन्सेसले ८९५ जनाका लागि रोजगारीको अवसर सिर्जना गरेको छ।
कलेजले अस्पताल र कलेजका विभिन्न विभागका लागि नर्सिङ, कन्सलटेन्ट डाक्टर, मेडिकल अफिसर, फार्मेसी, र ल्याबसम्बन्धी पदमा ठूलो संख्यामा जनशक्ति माग गरेको छ। नर्सिङतर्फ मात्र ४०० जना नर्सको माग गरिएको छ।
पूर्वाञ्चल विश्वविद्यालयबाट सम्बन्धन प्राप्त यो कलेज पहिले बुटवलमा सञ्चालनमा थियो। गत साउनमा नेपालगन्ज हस्पटिल एन्ड रिसर्च ट्रेनिङ सेन्टर प्रालीसँग मर्ज भई नेपालगन्जमा स्थानान्तरण भएको हो। कलेजलाई मेडिकल व्यवसायी खुमा अर्यालले सञ्चालन गरेका छन्।
अर्यालले केही दिन अघि दाङस्थित ५ सय शय्याको अस्पतालका लागि पनि ८ सय भन्दा बढी जनशक्ति माग गरेका थिए। हाल उनी दुई कलेज र अस्पतालमार्फत १७ सयभन्दा बढी व्यक्तिलाई रोजगारी दिन लागेका छन्।
