ल्हासा: चीनको दक्षिणपश्चिमी सिजाङ स्वायत्त क्षेत्रको डिङ्ग्री काउन्टीमा मङ्गलबार बिहान गएको शक्तिशाली भूकम्पमा परी ज्यान गुमाउनेको संख्या १२६ पुगेको छ। भूकम्पमा घाइते हुनेको संख्या १८८ पुगेको छ।
चीनमा भूकम्पको विवरण:
बेइजिङ समयअनुसार बिहान ९:०५ बजे ६.८ म्याग्नीच्युडको यो भूकम्प सिगाजे सहरस्थित डिङ्ग्री काउन्टीको त्सोगो टाउनशिप केन्द्रबिन्दु भएर गएको थियो। केन्द्रविन्दुको २० किलोमिटर दायराभित्रका २७ गाउँमा करिब ६,९०० मानिस बसोबास गर्दछन्। डिङ्ग्री काउन्टीमा कुल जनसङ्ख्या ६१,००० भन्दा बढी रहेको सरकारी तथ्याङ्कले जनाएको छ।
भूकम्प प्रभावित क्षेत्रमा उद्धार प्रयासहरू:
भूकम्प प्रभावित क्षेत्रमा हालसम्म ३,४०० भन्दा बढी उद्धारकर्ता र ३४० भन्दा बढी स्वास्थ्यकर्मी खटाइसकिएको छ। उद्धार र राहत कार्यलाई तीव्र बनाउन आपत्कालीन सेवाहरूलाई परिचालन गरिएको छ।
भूकम्प प्रभावित क्षेत्रमा मौसमको चुनौती:
आगामी तीन दिनसम्म डिङ्ग्री क्षेत्रमा न्यूनतम तापक्रम माइनस १८ डिग्री सेल्सियसबाट माइनस १४ डिग्री सेल्सियससम्म रहने अनुमान गरिएको छ, जसले राहत र उद्धार कार्यमा थप चुनौती निम्त्याउने सम्भावना रहेको छ।
यस प्राकृतिक प्रकोपले डिङ्ग्री क्षेत्रको जनजीवनमा गम्भीर असर पुर्याएको छ। सरकारी तथा गैरसरकारी निकायहरूले उद्धारकार्यमा जुटिरहेका छन्।
काठमाडौँ उपत्यकासहित आसपास, तराई एवं पूर्वी नेपालका झापा, मोरङ, सुनसरी, उदयपुर, खोटाङ, ओखलढुङ्गा, भोजपुर, धनकुटा, तेह्रथुम, पाँचथर, इलाम, सोलुखुम्बु, सङ्खुवासभा, ताप्लेजुङ लगायत जिल्लामा भूकम्पको महसुस गरिएको थियो ।
