नेपालगन्ज, आषाढ ६, रुकुम पश्चिमको आठबिस्कोट नगरपालिका–१४ पिपलचौर नजिक टिप्पर दुर्घटना हुँदा चालकसहित दुईजना बेपत्ता भएका छन्।
प्रहरीका अनुसार सोमबार साँझ करिब ७ बजेर १५ मिनेट जाँदा टिप्पर अनियन्त्रित भई भेरी नदीमा खसेको हो। दुर्घटनामा टिप्पर चालक सयदसहित दुईजना सवार रहेको जनाइएको छ।
स्थानीयवासीका अनुसार टिप्पर नदीमा खसिएको देखिए पनि हालसम्म न त टिप्पर फेला परेको छ, न त सवार व्यक्तिहरूको अवस्था नै खुलेको छ। दुर्घटनापछि सुरक्षाकर्मी र स्थानीय बासिन्दाले खोजी तथा उद्धार कार्य सुरु गरेका छन्।
अँध्यारोका कारण खोजी तथा उद्धार कार्यमा कठिनाइ भइरहेको प्रहरीले जनाएको छ। घटनाबारे थप विवरण आउन बाँकी रहेको र आवश्यक अनुसन्धान जारी रहेको प्रहरीको भनाइ छ।
